🌺බැද්දේ කුමරිය 🌺

🌺 බැද්දේ කුමරිය 🌺

අද අවසන් කොටස

( 30 වෙනි කොටස )

https://www.facebook.com/groups/2653780434897311/permalink/3087348051540545/

"සිරිදාස මට හිතෙනවා කළුතර ගිහින් ජයන්ති හම්බවෙලා, මම එයාව කසාඳ බදින්න කැමති නෑ කියලා කියන්න..."

"ඒකි උඹට බනියි....ජයන්තිගෙ අම්මලා විතරක් නෙමේ,මාළිගෙ අම්මලත් උඹට බනියි. "

" ඒකට කමක් නෑ.....උඹගෙන් දෙයක් අහන්නද මම ...?

"මොකක්ද...?

"උඹ කැමති නැද්ද ජයන්තිට...? ජයන්තිව කසාඳ බදින්න..."

"මම...?

සිරිදාස ලැජ්ජාවෙන් ඇඹරේ...

"අකමැත්තක්ම නෑ...කෙල්ලගෙ තොරොම්බල් ටික, බැන්දට පස්සෙ හලලා ගන්න පුලුවන් උනොත් ,...නරකම නෑ...ඔක්කොටම වඩා ..දේපළ ටික..මගෙ අම්මෝ... මට මේ කන්තෝරුවේ කුරුටු ගගා ජීවිත කාලෙම ඉන්න ඕනත් නෑ එහෙනම් ....එහෙම උනොත් මට බැරියැ උඹට අතමාරුවක් එහෙමත් දෙන්න...😀මොකද සුනිලා බැන්දට පස්සෙ ...උඹට නෑදෑයෝ සල්ලි බාගේ, දේපළ මුකුත් නැතුව.....,සුනිලගෙ ලස්සන විතරක් බල බලා තමයි ඉන්න වෙන්නේ....".

" ඒකට කමක් නෑ...බඹා කෙටුව හැටියට නේ....හැම දේම සිද්ද වෙනවා කියන්නේ....."

"අපි එහෙනම් හෙට කළුතර ගිහින් ජයන්ති හම්බවෙලා මේක කියමුද...?

"නියමයිනේ....කෙල්ල මට කැමති වෙයිද...?එහෙම උනොත් නම් මම ගොඩ......උඹ වලේ......හදිස්සියක් උනොත්, පොල් වත්තේ පොල් ලෙලි ගහන්න මට උඹවත් ගන්න පුලුවන් වෙයි....😃 ..."

"ඔව්...ඉස්සරහ කාලේ එහෙම නම් වෙන්න බැරිත් නෑ....එහෙනම් හෙට උදේ අපි එහේ යමු....හැබැයි ජයන්තිට ලොකු බොරුවක් කියන්න වෙනවා...."

"ඒ..මොකක්ද ?

"හෙට ගිහාම උඹ බලා ගනින්කෝ..ගල් පැලෙන බොරුවක් කියලා තමය ....අක්කයි, තාත්තයි වගේම මටත් බේරෙන්න වෙන්නේ...."

"මට නම් ලැජ්ජයි වගේ...අපි දෙන්නව උං ගහලා පන්න ගනීද...?

"ගිහිල්ල බලමු...."

පසුදින උදේ අපි කොළඹ සිට, කළුතර ජයන්තිලගෙ ගෙදර ගිය ගමන, ජයන්තිටත් , ඇයගෙ දෙමව්පියන්ට පුදුමයට කාරණයක් විය. හොද වෙලාවට ඒ වනවිටත් අක්කා, මම ජයන්ති කසාද බදින්න අකමැති බව ඔවුන්ට කියා නොතිබිම හොදට ගියේය.

"අය්යලා තකහනියේ මේ හදිසියේ කියන්නෙවත් නැතුව ආවේ ඇයි...? ජයන්ති පුදුම වී ඇසුවේය.

"නිකම්...මේ සිරිදාසට ඔයාව දකින්න ආසයි කිව්වා...මම කාටවත් නොඇසෙන්න ජයන්තිට කිව් විට ඇය පුදුමයෙන් මෙන් සිරිදාස දෙස බැලීය.

සිරිදාස විලියෙන් මෙන් බිම බලාන ඇඹරෙයි.

ජයන්තිලාගේ ගෙදර තේපැන් සංග්‍රහයෙන් පසු, මම ඇය තනියම ඔවුන්ගේ ගෙදර වත්තට කැදවාගෙන ගොස් ඇය සමග කතා කලෙමි.

"ඇයි සුමල්.....මට තනියම කතා කරන්න තියෙනවා කිව්වේ...?

" අපේ අක්කලා හරි ප්‍රශ්නයකින් ඉන්නේ....ඔයගොල්ලන්ගෙ දෙමව්පියන්ට මේක කියන්නේ කොහොමද කියලා....ඒ නිසයි මමම මේක ඔයාට කියන්නම් කියලා මෙහේ ආවේ..."

"ඒ මොකක්ද සුමල් ඒ...කියන්න තියෙන්නේ නරක දෙයක්ද..? මට අහන්න බයත් වගේ....."

"නරක දෙයක් තමයි ජයන්ති...අපේ තාත්තලා අපි දෙන්නගෙ කේන්දර බලවලා.....ඒ දෙක ගැලපෙන්නෙ නෑලු...මාළිගෙයි මගෙයි කේන්දර දෙක වගේම ඒ දෙකෙත් දෝශ තියෙනවලු...."

"අනේ...මම කොච්චර ආසාවෙන්ද අපේ කසාදය ගැන හිතාන උන්නේ.....මම මගේ යාලුවන්ටත් කිව්වා ලඟදිම මම කසාද බදින්න යන්නෙත් කියලා ..."

"ඔයා දන්නවද දන්නෑ...මගෙයි මාළිගෙයි කේන්දර හරියට ගැලපිලා නෑ......අපේ අක්කා ඕවා ගනන් ගන්නෙ නැතුව තමයි මට මාළිව බන්දලා දීලා තියෙන්නේ .....ඒ නිසා තමයි මාළිට ඔහොම උනේ....මම කැමති නෑ මම නිසා, ඔයාටත් ඒ වගෙ දෙයක් වෙනවට...අපි මේක දෙමව්පියන්ට කියන්න ඉස්සර, හිතෙන් අත් ඇරලා දා ගමු ජයන්ති ....අපේ අක්කලා අපේ මඟුල ගන්න හැදුවත් ඔයා ඒකට කැමති වෙන්න එපා...ඒක කියන්න ඕන නිසයි මම මේ තකහනියක් මෙහෙ ආවේ... මම හෙන ලොකු බොරුවක් ජයන්තිට කිව්වේ...ඉදිරි කාලේ අපේ මඟුල නොකෙරෙන විදිහටය...

"මට හරි දුකයි සුමල් ....මම ඔයාට හරි කැමැත්තෙන් හිටියේ......".ජයන්ති බාගෙට අඩමින් කීය.

"ජයන්ති අපි මෙහෙම කරමුද....මම නම් එක පාරක් කසාද බැදලා දරුවෙකුත් ඉන්න මිනිහෙක්....ඒ උනාට මගේ යාළුවා සිරිදාස එහෙම නෙමේනේ ....එයා තවම තරුණ තනිකඩයා....එයා ඔයාට හරි කැමතියි ...ඔයා එයාට කැමති වෙලා, අම්මලාට කියලා ,එයාව කසාද බදින්න. සිරිදාස ගොඩක් හොද කෙනෙක්...මම වගේම ආන්ඩුවේ රස්සාවක් කරන, ඉංග්‍රීසි කතා කරන කෙනෙක්නේ...සිරිදාස ගෙ තාත්තට ව්‍යාපාරයක් එහෙමත් තියෙන කෙනෙක් ....ජයන්ති මොකද කියන්නේ...මම කියන්නද සිරිදාස ට ඔයත් එක්ක කතා කරන්න කියලා ..."

" මම කැමැත්තෙන් හිටියෙ ඔයාට, මගෙ යාලුවො ඔක්කොම බලාගෙන ඉන්නේ, ලඟදිම මගෙ මඟුල කෙරෙනකම්. ....ඒගොල්ලෝ ඔයාව, සිරිදාසව දන්නෙ නැති නිසා, මටනම් ඒක ප්‍රශ්නයක් නෑ....සිරිදාසව මම කතා කරලා, ආශ්‍රය කරලා තියෙන නිසා, දන්නවා එයා හොද කෙනෙක් කියලා ... .... ඔයාගෙයි මගෙයි කේන්දර ගැලපෙන්නෙ නැත්තම් අපි අම්මලාට සිරිදාස ගැන එහෙනම් කියලා ....මේ මඟුල කෙරෙන විදිහක් ගැන බලමු....අපේ අම්මලත් කැමති වෙන එකක් නෑ...මාළි අක්කා වගේම මාත් මැරිලා යනවට..."."

"මට හරි සතුටුයි ජයන්ති ..ඔයා මේක හොදටම තේරුම් ගත්ත එක.....ඉන්න එහෙනම් මම සිරිදාසට කතා කරන්නම්...ඔයා එයා එක්ක ඉස්සරහ කාලේ, වෙන්න ඕන දේවල් , පවුල් වල දැනගන්න ඕන දේවල් එහෙම ඔයාම එයත් එක්ක කතා කරලා දැන ගන්නකෝ. ..."

"මොනව උනත් ඉස්සරහ කාලේ අපේ අම්මලා තාත්තලාට හිත රිදෙන දෙයක් වෙන්න ඉඩ තියන්න බෑ.... ඒ නිසා මම ඔයා කියපු කතාව , සිරිදාසගේ විස්තරය අම්මලාට කියන්නම්.

"ඒක හොදයි ජයන්ති .."

එදින අපි ජයන්තිලාගෙ ගෙදරින් දවල්ට බත් කා, හවස බෝඩිමට එනවිටත් ,ජයන්තිගෙ අම්මලත් සෝමෙට කැමති බව මට තේරි ගොස් තිබුනි. සිරිදාස මම වගේම ආන්ඩුවේ රැකියාවක් කරන, ඉංග්‍රීසි කතා කරනා කෙනෙක් වීම නිසා එය එසේ වන්නට ඇත.

මගෙයි ජයන්තිගෙයි කේන්දර නොගැලපීමට ඔවුන් හොදටම බය වී ඇත්තේ මාළිට උන දෙය ජයන්තිටත් සිදුවේවි යැයි බියෙනි...... මම ජයන්තිට කිව් බොරුවට, ඒ ගෙදර හැමෝම අහුවීම නිසා අපේ තාත්තයි අක්කටයි ඇතිවෙන්න ගිය ලැජ්ජාවෙන් මම ඔවුන්වත් නිදහස් කලා යැයි මට සිතේ......එය එසේ හෝ සිද්ද වීම ගැන මගේ හිතට නිදහසක් ඇති විය. මාළිගෙ මරනින් පසු එයට පසුතැවිල්ලෙන් සිටි ජයන්තිගෙ දෙමව්පියන් මම කිව් දේ විශ්වාස කර සිරිදාසට කැමති වීම සිරිදාස ටත් ලොකු සතුටක් විය.

වැඩි දවසක් යන්නට මත්තෙන්, සිරිදාස ගෙ දෙමව්පියන් අඩගසාගෙන, ඔහු ජයන්ති බලන්න එන පොරොන්දුව පිට, අප නැවත කොළඹ ආවේ ලොකු සතුටකිනි.

"උඹ ජයන්තිගෙ අම්මා කිව්ව විදිහට , පුලුවන් ඉක්මනට ජයන්තිලාට උඹේ කේන්දර කොපිය ගිහින් දීපන්....හැබැයි මගෙ මඟුල ඉවර වෙනකම් ඉදලා....හදිස්සියෙවත් උඹලා දෙන්නගෙ කේන්දර ගැලපුනේ නැත්නම්....තමා ප්‍රශ්නය..."

තාත්තා අක්කා ඇතුළු නෑහිතවතුන්ගේ අකමැත්ත උඩ හෝ මම සුනිලා කසාඳ බදින්න කැමති වීම, ගුණදාස හා පාලගේ ඉමහත් සතුටට හේතු විය. කොළඹ ආ ඔවුන් නැවත ගමරට බලා ගියේ, මගෙත් සුනිලාගේත් විවාහ උත්සවය පුලුවන් ඉක්මනට සුළුවෙන් ගන්නට කටයුතු කතා කරගෙනය.

ගුණදාස හා පාල කොළඹ ඇවිත් , නැවත රුවන්ගම බලා ගිය පසු, මමත් සිරිදාසත්, දිනක් රුවන්ගම ගොස්, සුනිලා මුණගැසි විවාහය සිදුවිය යුතු ආකාරය ගැන කතා බහා කරගෙන පැමිනියෙමු. එදින සුනිලා බොහෝ සතුටින් උදම්ව සිටි අතර වෙන කවදාටත් වඩා මගේ ලඟින් හිඳගෙන මා සමඟ කතා කලේ බෝහෝ ආදරණීය ලෙසය.

ගුණදාස නැවතත් කොළඹ විත් මා කන්තෝරුවේදී මුණගැසුනේ , මගෙත් සුනිලාගේත් මඟුල් ගෙදරට දින පහක් පමණ තිබියදීය. බදාදා රුවන්වැල්ලේදී, රෙජිස්ට්‍රාර් කන්තෝරුවට ගොස් කසාදය පොතේ අත්සන් කර එදින රුවන්ගම කන්ද පල්ලෙහා තිබෙන, සුනිලාගෙ මස්සිනාගේ ගෙදර ,නෑදෑහිතමිතුරන්ට දහවල් බෝජ්ණ සංග්‍රහය පවත්වා එදින රෑට අප දෙදෙනාට පැල්මඩුල්ලේ තනායමේ නැවති , දෙදිනකට පසු සුනිලාගෙ ගමේ යන්නට ලෑස්ති කර තිබෙන බව ගුණදාස කීවේය. ගමේ නෑදෑයින් හා යාලුවන්ට අප දෙදෙනා, විවාහයෙන් පසු ගමේ යන දිනට,බෝජණ සංග්‍රහයක් ලෑස්ති කිරිමට සියලු දේ සුදානම් බව ගුණදාස කිවේය.

ඔවුන් ලෑස්ති කර තිබුන සියලු දේට එකග වී මමත්, සිරිදාසත් කන්තෝරුවේ යාළුවන් දෙතුන් දෙනෙක්ද සමඟ අපේ මඟුල වෙනුවෙන් රුවන්ගම බලා යන්නට සියලු දේ ලෑස්ති කර හමාර කෙරුවෙමු.

අක්කා සමඟ තරහ වී ඇගේ ගෙදරින් පිට වී කොළඹ ආපසු, මම නැවත ඇය මුණගැසෙන්න නොගියෙමි. නමුත් මම තනි කැමැත්තට, සුනිලා කසාඳ බදින්න යන ආරංචිය අක්කාගෙන් දැන ගෙන ශාන්ත අයියා මගේ බෝඩිමට ආවේ මීට දින දෙකකට උඩදීය.

‘‘මල්ලි අපිත් එක්ක තරහ වෙලාද පහුගිය දවස්වල අපේ ගෙවල් පැත්තෙ නාවේ...?.‘‘ ශාන්ත අයියා, අක්කාගෙ සැමියා කවදත් මට හිතවත්ය.

‘‘තරහක් නෑ අයියේ. අක්ක තාම හිතන් ඉන්නෙ මං පොඩි ළමයෙක් කියල.... එයා කියන හැමදේකටම මං කැමති වෙන්න ඕන කියලා එයා හිතන්නේ......මටත් කියලා කැමති දෙයක් කර ගන්න අයිතියක් තියෙන්න ඕනනේ.....‘‘

‘‘ඒක නම් ඇත්ත.... යසෝමා ඉතිං මටවත් තනියම තීරණයක් ගන්න දෙන්නෙ නෑනේ.... ඔහොම තමයි මල්ලි ගෑණු.‘‘

ශාන්ත අයියා ද අක්කා විවාහ කරගත් පසු, අක්කාගෙ අණසකට යටත්ව ජීවත් වෙන කෙනෙක් බව මම දන්නෙමි.

‘‘මං සුනිලව බඳින්න ගත්ත තීරණය වෙනස් කරන්නෑ අයියේ......‘‘

‘‘ඒකට කමක් නෑ මල්ලි....ඒක මල්ලිගෙ කැමැත්ත වගේම තමන්ගෙ අයිතිවාසිකමක්..... මල්ලිට ඒ ළමයා හොඳට ගැලපෙනවා. හොඳ උත්සහවන්ත ගෑණු ළමයා...මල්ලිට ජයන්තිව කසාද බන්දලා දෙන්න, අක්කා ගොඩක් දවසක ඉදන් බලන් හිටියනේ....ඊටත් ඒ මිනිස්සුන්ට අපි ඒකට පොරොන්දු වෙලා හිටිය නිසයි අක්කට තරහ ගිහින් තියෙන්නේ...ඒ මිනිස්සුන්ට මූණ දෙන්න බැරුව...සුනිලා ගමේ ගොඩේ උනාට, ඒක විවාහයට බාධාවක් කරගන්න ඕනේ නෑ....ඒ ළමයා ඉක්මනට කොළඹට පුරුදු වෙයි.... මල්ලි සුනිල කසාඳ බැඳලා හොඳින්න ඉන්න. මගෙනුත් සුභ පැතුම්.....‘‘

"අය්යට ආරංචියක් කියන්න තියෙනවා ....සිරිදාස ජයන්ති කසාද බදින්න කැමතියි ...ජයන්තිත් ඒකට කැමතියි. අය්යා ඒක අක්කට කියන්න....අනික මම සුනිලා කසාඳ බැන්දට පස්සෙ , මගෙ දරුවා අපේ ගාවට ගන්නවා....අක්කට ඒකත් කියන්න අය්යේ...."

"සිරිදාස ජයන්ති කසාඳ බදින්න යන එකනම් හොද ආරංචියක්....අපට එතකොට මාළිගෙයි, ජයන්තිගෙ ගෙදරින් එන ප්‍රශ්න එන්නෙ නෑ....හැබැයි දරුවාව නම් ,අක්කා ඔයාට ආපහු දෙයිද කියලා තමයි සැක.....දරුවා දැන් අපටනේ අම්මා තාත්තා කියන්නෙත්...අපි බලමුකෝ මොකක්ද ඒකට කරන්න පුලුවන් කියලා ...."

ශාන්ත අයියා ගැන මට විශාල ආදරයක් ගෞරවයක් ඇති විය. ඔහු මගේ අක්කාගේ සැමියා වගේම මගේ හිත තේරුම් ගන්න පුලුවන් උන අපේ පවුලේ එකම කෙනා වීම නිසා‍ත්ය.....මගේ අක්කාගෙ තාත්තාගේ කැමැත්ත, මගේ විවාහය සඳහා නොලැබුනත් අක්කාගෙ සැමියා වන,ශාන්ත අය්යාගේ කැමැත්තවත්, මට ලැබීම, ඔහුගෙ ආශිර්වාදය මට මගේ විවාහයට ලැබීම ගැන මට විශාල සතුටක් ඇතිවිය.

‘‘දැන් මල්ලි කවද්ද සුනිලව කසාඳ බඳින්නේ...?.‘‘

‘‘එන බදාදා.‘‘

‘‘මෙච්චර ඉක්මණට....? කවුද එතකොට මඟුල් ගෙදර යන්නේ......‘‘

‘‘ සිරිදාස තමයි ඔක්කොම ලෑස්ති කරන්නේ.... තව කන්තෝරුවේ යාළුවෝ දෙන්නෙක් ඒගොල්ලන්ගෙ නෝනලත් එක්ක එනවා කිව්වා ....‘‘

‘‘ආ... එහෙනම් හොඳයි.... මොනව උනත් ගෑනු අය දෙන්නෙකුත් මඟුලට යන එක හොදයි .... අනේ මල්ලි මට නම් මඟුල් ගෙදර එන්න වෙන්නෑ.... දන්නවානේ අක්කා දැන ගත්තොත් මමත් ගෙදර ඉඳල හමාරයි....‘

‘‘ආ... ඒකට කමක් නෑ. අය්යා පුළුවන්නම් තාත්තට කියන්න අපේ විවාහය ගැන.... මං සුනිලා මෙහේ කැන්දන් ආවට පස්සෙ තාත්තා බලන්න යනවා.....‘‘

‘‘හොඳයි මං මාමට කියන්නම්කෝ......එහෙනම් විවාහයෙ වැඩ කටයුතු හොදින් කරගන්න ලැබේවා කියා මම ප්‍රර්තනා කරනවා.....‘‘

"බොහොම ස්තුතියි අය්යේ...."

"මගේ හිතේ අක්කා එක්ක තරහක් නෑ.....පස්සෙ දවසක මම සුනිලා එක්ක අක්කා බලලා යන්න එන්නම්...."

"ඒවා පස්සේ බලන්න බැරියැ ....මල්ලි හිතේ කහටක් නැතුව මඟුලේ වැඩ ටික කර ගන්නකෝ....."

#######$

මගෙත් සුනිලාගේත් කසාඳය කිරීම සඳහා බදාදා පාන්දර රුවන්වැල්ල ,බලා යෑමට මම සතුටින් උනත් , හිතේ දෙගිඩියාවෙන් ලෑස්ති වි උන්නෙමි. මීට ප්‍රථම මගෙත් මාළිගෙත් විවාහය සිදුකල දිනය, ඒ වෙනුවෙන් ඒ ගමන යෑමට ලෑස්ති වි සිටි සෙනග , කළුතර මාළිගෙ නිවසේ, ජයට ගත් විවාහ මංගල්ලය මට මැවි පෙනෙන්න විය. එදින මගේ දෙවන මණමාළයා ලෙස පෙනි සිටි සිරිදාස අදත් මගේ දෙවන මණමාලයා ලෙස මගේ ලඟින්ම ඉදී.... මගේ දුකට සැපට එවන් මිත්‍රයෙක් සිටිම ගැන මට ඇත්තේ ලොකු සතුටක් මිශ්‍ර ආඩම්බරයකි.

කන්තෝරුවේ මගෙ ළගම යාළුවො දෙන්නෙක් හා ඔවුන්ගේ බිරින්දෑ වරු දෙදෙනාද මගේ විවාහය සදහා රුවන්ගම බලා යෑමට, වාහනයක් ඇතුළු සියලු කටයුතු සිරිදාස ලෑස්ති කර තිබුනේ මගේ කැමැත්ත අකැමැත්ත වත් නොඅසාය.

බදාදා පාන්දර රුවන්ගම බලා යන්නට ලෑස්ති කර තිබුන වෑන් රතය නියමිත වේලාවට අපේ බෝඩිම ඉදිරිපිටට ආවේය..... ඒ වාහනය තුල මගේ කන්තෝරුවේ හොදම යාළුවන් දෙදෙනා හා ඔවුන්ගේ බිරින්දෑවරු දෙදෙනාද විය. සිරිදාස අපට රුවන්වැල්ල බලා යෑමට ලෑස්ති කර තිබුන වාහනයට මාත් සිරිදාසත් ගොඩ විය.

කොළඹින් පිට වි රුවන්ගම බලා යන අප මුළින්ම රුවන්වැල්ලේ තානයමට යෑමට නියමිත බව කීවේ සිරිදාසය. හේතුව කන්තෝරුවේ යාලුවන්ගෙ බිරින්දෑ වරුන් දෙදෙනා,එදින උදේ සාමාන්‍ය ඇදුමකින් ගමන යන්නට සැරසී සිටිමත්, ඔවුන් රුවන්වැල්ලේ තානායමට ගොස් , මගේ මඟුලට යන්න සාරියක් ඇදගන්න ,වේලාසන කාමරයක් ලෑස්ති කර ඇති බවත් සිරිදාස කීවේය.

අප හය දෙනා, බදාදා උදේ රුවන්වැල්ල බලා යන්නට ලෑස්ති වි ඉන්නේ, මගේ නෑදෑයින්ට හොරෙන් කෙරෙන මගේ මඟුල වෙනුවෙනි. මගේ මඟුලට යන යාළුවන් සියල්ලන්ගේ හිතේ ඇත්තේ චකිතයක් මිශ්‍ර සැකයක් බව මට තේරි ගොස් ඇත. මගේ තාත්තා පැමිණ මේ මඟුල කැඩෙන ලෙස මොනවා හෝ නරක දෙයක් කරය්දෝ කියා සැකයක් හැමෝගෙම සිතේ කොනක ඇති බව වැටහේ....

මට සුනිලා අවසන් වතාවට මුණ ගැසුණේ, ගිය සුමානෙ ගුණදාසලා කොළඹ ඇවිත් මාව මුණගැසි ගිය පසුය. ඉන් පසු මම කළබලේ සිරිදාස සමග රුවන්ගම ගොස් සුනිලා සමග අපේ කසාදය සිද්ද වෙන ආකාරය ගැන කතා කරගෙන ආවෙමු. එය ගතවි සුමනයකට පසු අපේ විවාහය සිද්ද වීමට යයි.

මගේ දෙවෙනි විවාහයේ හැම වැඩ කටයුතුත්තක්ම සිරිදාස සැලසුම් කර ඇත. මම සුනිලාට කැමැත්තෙන් ඉන්නවා හැර, දුරදිග බලා වෙන කිසි දෙයක් ලෑස්ති කර ගැනිමට තරම් හොද මානසිකත්වයක මම නොසිටියෙමි. සිරිදාස කියන හැම දේකටම කැමති වීම හැර වෙන දෙයක් කිරිමට තරම් දැනීමක්ද මට නොතිබුනි.

විවාහය සදහා ලෑස්ති විමට, හැමදේකටම තිබුණේ සුමාන දෙකක් වැනි කෙටි කාලයක්ය. එය මෙතරම් හදිසියේ සිදුවීමට හේතුව ,සුනිලාගෙ මගඇරුනු විවාහය සිදුවීමට නියමිත දිනටම, අපේ විවාහය සිදුකර ජුවානිස් ඇතුළු ඇයගේ නෑදෑයින්, ලැජ්ජාවෙන් බේරා ගැනිමටය.

විවාහ දින උදේ අපි ලෑස්ති කරගත් පරිදි, කන්තෝරුවේ යාලුවො සමඟ, රුවන්වැල්ලේ තානායමට, උදේ අටහමාරට විතර වෙනවිට අපට යෑමට හැකි විය. අපි සියල්ලෝ මඟුල් ගෙදර යෑමට පෙර, කුළියට ගත් තානායමේ කාමරය තුල, ඇදුම් ඇද පැළඳ ගත්තෙමු.

"දැන් හැමෝම ලෑස්තියි නේද....?එහෙනම් අපි දැන් විවාහය ලියාපදිංචි කරන රෙජිස්ට්‍රාර්ගේ කාර්‍යාලයට යමුද?..... සුනිලගෙ ගෙදර කට්ටිය එතනට ඇවිත් ඉන්නවා කිව්වා උදේ 10.30 වෙනකොට....සිරිදාස මගේ මඟුලේ සියලු වැඩකටයුතු ලෑස්ති කරමින් හිදින්නේය. ඔහු කියනා ආකාරයට, මම සියලු දේට ඔළුව පහත් කරගෙන කතා බහක් නැතුවම සිටියෙමි. මේ සියලු වෙන සැමදේ වෙනුවෙන් මගේ හිත තවමත් බයෙන් ගැහෙමින් දෙගිඩියාවෙන් පසුවවේ. අක්කා තාත්තා නැතුව සිද්ද වෙන්න යන මගේ මේ මඟුල ගැන මට ඇත්තේ සැකයකි. කොයි මොහොතේ හෝ තාත්තා පැමිණ මගේ මේ කසාඳය නවත්වාවි කියා මට ඇත්තේ බයකි. සිරිදාස විවාහය ලියාපදිංචි කිරිමේ කටයුතු සියල්ල කළබලේ ලෑස්ති කරමින් පසුවන බව පෙනේ....ඔහුගෙ හිතේද ඇත්තේ සැකයක් බව මට තේරේ. මගේ හොදම යාළුවා වන සිරිදාස ,අපේ අක්කා තාත්තා ගැන හොදින්ම දන්නා නිසා එසේ පසුවන බව මට තේරුම් ගත හැක.

අපේ විවාහය ලියාපදිංචි කර ගැනිමට රෙජිස්ටාර්ගේ කාර්යාලය වෙත, අප සියලු දෙනා රුවන්වැල්ලේ තානායමේ සිට, වෑන් රතයෙන් උදේ 10.30 විතර වන විට එහි ගියෙමු.

සුනිලාගේ ගමේ සිට රුවන්වැල්ලට ගොඩක් දුර පයින් පැමිණිය යුතු බැවින්, ඔවුන්ද ඊට පෙර දා රුවන්වැල්ලට නුදුරු ඇයගෙගෙ මස්සිනාගෙ ගෙදර නවාතැන් ගෙන ඇති බව අපට දැනගන්නට ලැබුනි. විවාහය ලියාපදිංචි කිරිමෙන් පසු, එම නිවසේම ඔවුන් අප වෙනුවෙන් බෝජන සංග්‍රහය සූදානම් කර ඇති බැව් දැනගන්නට ලැබුනේ ගුණදාසගෙනි.

රුවන්වැල්ලේ තානායමේ සිට අප රෙජිස්ටාර්ගේ කාර්යාලයට, ගියේ මමත් සිරිදාසත් ඇතුළු අනිත් යහළුවන් හා ඔවුන්ගේ බිරින්දෑවරු මඟුල් ගේකට ගැලපෙන ලෙස සැරසී ගෙන්නය.

මාත් දෙවන වරට ද මගේ සුදු කෝට් සූට් එක ඇඳ සැරසි උන්නෙමි. මම මෙම ඇඳුම මගෙත්, මාළිගෙත් විවාහ දින සැරසී උන් ඇඳුමම විය. අපේ පැත්තෙන් මාත් ඇතුළුව හයදෙනෙක් විවාහයට පැමිණ සිටියෝය.

සුනිලාගෙ පැත්තෙන් දහදොළොස් දෙනෙක් පමණ විවාහයට පැමිණ සිටි අතර ඔවුන් ඔවුන්ගෙ ප‍්‍රමාණයට ලස්සනට ඇඳුම් පැළඳුම් ඇද පැමින සිටියේය.

අපේ පැත්තෙ කට්ටිය දැක ඔවුන් රෙජිස්ටාර් කාර්යාලයේ පැත්තකට වී සිටියා හැර කතාබහට නොපැමිණියේය. අප කොළඹ ඈයන් බැවින් ඔවුන් අපට ගරු සරු ඇතුව කතා කරමින් හැසිරෙති. සිරිදාස හා ගුණදාස මඟුල් ගෙදර නොහොත් අපේ විවාහය ලියාපදිංචි කරන හැම වැඩකටම දුව පැන වැඩ කරන්නේය. සියලූම දේ සැලසුම් කරන්නේ සිරිදාසය . මගේ අවශ්‍යතාවයට, ඔහුගේ අනු දැනුම ඇතුව අපේ විවාහය සිද්ධ වෙමින් පවති.

අප සියල්ලෝ ම රෙජිස්ටාර්ගෙ කාර්යාලය ඉදිරිපිට සිට ගෙන සිටියේ නැකතට එහි ඇතුළට යන්නටය. නැකත් බලා ඇත්තේ සුනිලාගෙ පැත්තෙන්ය.

ඔවුන් පැමින තිබු වාහනයේ ඇතුළත සිටි සුනිලා වේලාව ලං වෙන විට, වාහනයෙන් බිමට බැස කාර්යාලය ඉදිරිපිටට ආවේ ඇගේ අක්කා කෙනෙකු සමඟ ය. ඇය දුටු වහාම මට විශාල සතුටක් දැණිනි. උඩරට ක‍්‍රමයට සුදු ලේස් ඔසරියක් ඇඳ ගෙන සිටි ඇය ඉතා පියකරු චාම් මණමාලියක් ලෙස මම දිටිමි. හීන් නළල් පටයක් දමා බෙල්ලට බැඳ තිබුණු ඇගේ විශාල කොණ්ඩයේ අරලිය මල් ගසා ඇත. කර මාළයක් පමනක් පැළඳ සිටි ඇය චාම් උඩරට මණමාලියක් ලෙස මට පෙනින. ඇය සරසන්න ඇත්තේ ඇගේ එකම අක්කා යැයි මට සිතේ... මා ඇය දෙස නෙත් නොපියා බලා සිටින බව දැනී ඇය හෙමිහිට ඔළුව උස්සා මා දෙස බලා පියකරු ලෙස දසන් නොපෙන්වා සිනා සී නැවත බිම බලා ගත්තාය.

රෙජිස්ටාර් කාර්‍යාලයේදි අපේ විවාහය ලියාපදිංචි කළ පසු අපි , සුනිලාගෙ මස්සිනාගේ ගෙයට ගියේ අපේ මංගල දින බෝජන සංග්‍රහයටය. දෙපැත්තේම නෑදෑයින්, යහලුවන් විස්සක් තිහක් පමණ එකතු වී කෙරුණු අපේ විවාහය ඉතා චාම් අයුරින් සුනිලාගෙ මස්සිනාගේ ගෙදරදි සිද්ධ විය.

එම නිවසේ අප වෙනුවෙන් ලෑස්ති කරතිබු චාම් මංගල පුටුවේ අප දෙදෙනා වාඩි වි හුන්නෙමු. සුනිලා මා ලඟම ලැජ්ජාවෙන් , කාසමගවත් කතාබහක් නැතුව ඉදගෙන හිදි. සුනිලාගෙ ගෙවල්වලට පහසුවෙන් යන්න පුළුවන් දුරකින් ඇගේ නිවස පිහිටා නොතිබීම නිසා අපේ විවාහය රුවන්ගම පාසැලේ එකම ගුරුවරයා වන සුනිලාගෙ මස්සිනාගේ මහගෙදරදී සිදු විය.

‘‘දවල් කෑම කාලා ඉමු නේද?‘‘

ගුණදාස හා සුනිලාගෙ සහෝදරිය අප දෙදෙනාට හා අපේ යහලුවන්ට ආරාධනා කලේය.

‘‘ එහෙනම් යං කෑම කන්න.....‘‘ මං සුනිලාගෙ අතින් අල්ලා ඇය නැගිට්ටුවේ සතුටිනි.

‘‘අද සුනිලා හරි ලස්සනයි...‘‘

"ඇයි අයියත් කෝට් සූට් ඇඳලා අද හරිම ලස්සනයිනේ.....‘‘

‘‘දැන් ඉතිං අයියා කියන්න එපා.‘‘

‘‘එහෙනම් මං මුළින්ම කතා කරපු විදිහටම මහත්තයා කියලා කතා කරන්නම්.....‘‘

‘‘ඔයාට ඕන එකක් කියන්න .. යං අපි කෑම කන්න.‘‘

සියල්ලෝම කෑම කා ඉවර වුණ පසු සුනිලාගෙ මස්සිනා වන රුවන්ගම පාසැලේ මුල් ගුරුවරයා, විසින් පැවැත්වු සුහද කතාවද ඉවර විය. ඔවුන් මටත් මගේ නෑදෑයින්ට සුනිලා භාර කළේ ජීවිත කාලයටම ඇයට හොඳ සැමියක් වී ඇයව හොඳින් බලා ගන්න ලෙස මට අවවාද අනුශාසනා කරමින්‍ ය.

‘‘එහෙනම් ජෝඩුව පිටත් වෙන වෙලාව හරි..... එහෙනම් ලෑස්ති වෙන්න නෑදෑයින්ට කතා කරල නැකතට පිටත් වෙන්න.....‘‘

සුනිලා සහ මම ජුවානිස්ට දෙකට නැමී වැඳ ආචාර කළෙමු. විවාහයට ඇවිත් සිටි වැඩිහිටි සියල්ලන්ටම වැද ආචාර කළ අපි දෙදෙනා, සිරිදාස ලෑස්ති කර තිබූ කුලී රියෙන්, අපට කලින් වෙන් කර තිබූ රුවන්වැල්ලේ තානායම බලා ගමන් ආරම්භ කළේ රියදුරත් සමඟය.

‘‘සුනිලා ඇයි කතාවක් නැත්තේ.‘‘

‘‘මට සතුට දරා ගන්න බෑ.....‘‘

‘‘ඒ කියන්නේ සුනිලා මාව කසාඳ බඳින්න ගොඩක් ආසාවෙන් ද හිටියේ.....?‘‘

‘‘ඇයි මහත්තයා කැමැත්තෙන් නෙමේ ද හිටියේ....?.‘‘

‘‘ඇයි නැත්තෙ... ඒ නිසානේ ඔයාව හොයා ගෙන ආයෙත් ආවේ.....‘‘ මං ඇගේ අත අල්ල ගෙන සිටියේ සතුට දොරේ ගලා යද්දීය.

‘‘හරි පුදුමයි නේද අපේ හමුවීම.....‘‘

‘‘ඒක තමයි ....ඒ කියන්නේ පතා ගෙන එන විදිහට තමයි හැමදේම සිද්ධ වෙන්නෙ කියලා...... ලංකාවේ දකුණු කරේ ඉපදුන මම, කොළඹ රස්සාව කරමින් ජීවත් වුණ මම ..... හද්ද පිටිසර කැලෙක හිටපු ඔයා වගේ ගැමි කෙල්ලක් අඳුනගත්ත හැටි..... මටත් හරි පුදුමයි ඒකට නම්......‘‘

‘‘ මහත්තයා ආයෙත් යන්නෙ නැද්ද අයියත් එක්ක මිනුම් වැඩ බලන්න.....‘‘

‘‘අපෝ නෑ... මේ ගිහින් කරගත්ත දේ නේ මේ....‘‘

මං ඇගේ කර වටා අත දා මගේ ඇඟට තුරුල් කරගත්තේ ආසාවෙන් සතුට දොරේ ගලා යද්දීය. ඇය මුතු සිනා පාමින් මට තුරුළු වුණේ ඇස් දෙක ද පියාගෙනය.

.... නිමි....

මා සමග මාසයක කාලයක් රැදෙමින් 💞බැද්දේ කුමරිය💞 නවකතාව කියවු ඔබ සැමට බොහෝම ස්තුතියි !!.

💞බැද්දේ කුමරිය💞 නවකතාවේ ඔබ දුටුව, අඩුපාඩු හා හොද නරක සියල්ල ඉතා කෙටියෙන් ඔබෙන් දැන ගැනිමේ බලාපොරොත්තුවෙන් මම පසු වෙමි. ඔබ සියලු දෙනාගේ ඇගයීම් මගේ ලිවිමේ හැකියාව තවත් දියුණු කරගැනීමට, මට බොහෝ උපකාරි වේයැයි මම විශ්වාස කරමි. එබැවින්

මම වෙනුවෙන් අදහස් බිදක් මෙහි යටින් ලිවීමට ඔබ සැමට කරන ආරාධනාවයි මේ.... ❤❤

-ස්තුතියි -

*ප්‍රිසිලා ගොඩහේවා *